زملكة الاعلام الرياضي منذ النشأة

المهزلة اللي بتحصل فـ المُستنقع اللي إسمه On Sport واللي المفروض إنها واحدة من أكبر القنوات الرياضية فـ مصر إن لم تكن أكبرهم وأهمهم وأكثرهم مشاهدة فـ الوطن العربي بأكمله مش مخلياني مستغرب ولا مُندهش !

يعني لما أشوف الكم الهائل ده من مُقدمي البرامج والمُذيعين والإعلاميين والمُحللين والضيوف والأشخاص المسؤولين عن البرامج الرئيسية فـ القناة ؛ والمعروف عنهم إنتمائهم الواضح للزمالك ؛ ولما أشوف الصمت المُخزي علي كوارث بتحصل في المعسكر الأبيض والناحية التانية لو حد بس ” کح ” فـ الأهلي بيتعمل عنه تقارير مطولة ؟!

وطول الوقت تشعر وک إن فيه توجه عام للهجوم والنقد الغير موضوعي وتحس إن الناس بتزق فـ سكة واحدة مُتفق عليها والكل بيتكلم بُناء علي سكريبت متوزع بعناية فائقة ؛ وكلام من نوعية كهرباء أول الراحلين عن الفريق وأحمد عبد القادر زعلان إنه مش بيشارك بشكل أساسي ومحمد محمود غضبان من إستبعاده ؛ وموسيماني عايز يزود عقده وبيهدد بـ الرحيل

والمناحة اللي بتتعمل والميتم اللي بيتنصب بعد كل مكسب وخزان الأحزان اللي بنشوفه فـ الوشوس بعد كل بطولة يفوز بيها الأهلي ؛ وناس أقل مايُقال عنهم إنهم آفاقين معندهومش ولو قدر بسيط مـ الحياد والشفافية والمنطق وتلاقيهم بمُنتهي البجاحة قاعدين يقطعوا وينهشوا فـ لحم مُدرب كسبان دوري وكأس و 2 شامبيونز علي التوالي وسوبر أفريقي وتالت عالم فـ أقل من سنتين .! مدرب لعب 70 ماتش كسب 50 وإتعادل 15 وخسر 5 منهم ماتش قدام البايرن وفـ النهاية بيتقال عليه محظوظ ومقدمش أوراق إعتماده للجمهور 😏 وكل ده برضه مش غريب ولاجديد ولا هو حدث إستثنائي .! لإنك لو بصيت للموضوع بتمعن من الشِق التاريخي هتلاقي إن زملكة الإعلام الرياضي سواء المقروء أو المسموع أو المرئي شيء مُتعارف عليه من زمان .!

بداية من محمد لطيف أحد أهم أقطاب الزمالك وأشهر مُعلق فـ مصر وقتها واللي كان مراقب عام ع البرامج الرياضية في التليفزيون لمدة 16 سنة ؛ بـ الإضافة لـ الإمبراطور فهمي عمر رئيس الإذاعة ومؤسس إذاعة الشباب والرياضة والإتنين دول تحديداً يُعتبروا من أهم الأسباب اللي ساهمت فـ زيادة شعبية وجماهيرية الزمالك لإنهم كانوا مسؤولين بشكل مؤثر ومُباشر عن تكوين الوعي الرياضي لـ مُشجع الكورة فـ مصر وقتها عن طريق الإذاعة اللي كانت هي المُتنفس الوحيد للناس خصوصاً فـ الخمسينات قبل ظهور التليفزيون ؛ لـ إن السواد الأعظم من اللي كانوا بيحبوا الكورة فـ الزمن ده كانت الإذاعة عبر الآثير بالنسبالهم هي الوسيلة الوحيدة اللي تخليهم يعيشوا فـ أجواء الماتش ويشوفوا التفاصيل ويسمعوها بعين وصوت المُعلق .!

الثنائي ده كان ليه دور مهم فـ تغييب عقول الناس والترويج لـ فكرة إن الزمالك هو القطب الثاني للكرة المصرية والمنافس التقليدي للأهلي ؛ ده بقي غير إطلاق الآلقاب والعبارات الرنانة وسيل مـ المديح والإطراء والإشادة بـ لاعبي الأبيض وده اللي هيخليك ک مُتلقي غصب عنك تحب وتميل للفريق اللي بُيقال عنه الكلام المعسول ده .!

ومش محمد لطيف وفهمي عمر بس هما اللي حملوا ع عاتقهم مُهمة التضخيم والمُبالغة فـ الإشادة بكل ماهو زملكاوي .! لكن كان فيه أسماء كتير وعلي سبيل المثال : فايز الزمر الإعلامي الشهير وعضو مجلس إدارة الزمالك ؛ ومحمود معروف الكاتب الرياضي والصحفي ومدير تحرير الجمهورية ؛ وناصف سليم رئيس قسم الرياضة فـ جريدة الجمهورية وعُمر بطيشة رئيس إذاعة الشباب والرياضة ووالد حاتم بطيشة ؛وإسماعيل البقري الناقد ورئيس قسم الرياضة فـ جريدة الأهرام وكامل البيطار الإذاعي الشهير وجلال معوض أيضاً الإذاعي الشهير وإبراهيم لطيف مخرج البرامج الرياضية والقائمة تطول …

حقاً إنه الإعلام الأهلاوي الأحمر .! 😅