مظلومية المؤامره على الزمالك ف القرن الحالي
صباح الخير حضر قهوتك و تعالى أحكيلك حكاية المؤامرة الكونيه على الملكى
- كان يا مكان سنة 2001 قررت الجمعية العمومية لنادى الزمالك بكامل إرادتها إنتخاب شخص إسمه مرتضى منصور فى منصب نائب لرئيس النادى اللى كان وقتها كمال درويش خلال ال 4 سنين مدة الدورة الانتخابيه مرتضى تقريبا كده إعْتال درويش معنويا عشان ينط ع الكرسى و إتهمه إتهامات كتيرة و خطيرة جداً
- لحد ما جات سنة 2005 وقرر مرتضى الترشح على منصب رئاسة النادى بدون قايمة ونجح مع مجلس غريب و عجيب إنتخبته الجمعية العمومية برضو بكامل إرادتها ، المجلس كان فيه ناس كتير من كل شكل و لون منهم إسماعيل سليم اللى نجح على منصب نائب الرئيس واللى كان على طول في إصطدام مع مرتضى منصور لدرجة إنهم صْربو على بعض ناااا..ر جوه النادى و إسماعيل سليم خد شومه على دماعْه يومها و دخل المستشفى ، الحْناقه وقتها كانت على اللايحه اللى كانت بتدي الحق ل سليم إنه يكون رئيس المكتب التنفيذى مرتضى قاله مفيش تنفيذي أنا التنفيذى إزاى ياعم قالهم هو كده مفيش ومفيش إجتماعات ل المجلس كمان انا المجلس ومفيش نادى أنا النادى من هنا ل هنا إستقال كام عضو في المجلس من جبهة سليم و المشاكل كترت والمجلس أصبح غير مكتمل النصاب القانوني فتدخلت وزارة الرياضه ومارست حقها القانوني و حلت المجلس وعينت مكان مرتضى مرسى عطا رئيس مؤسسة الأهرام و الرئيس المباشر لحسن حمدى اللي الزملكاويه بيتهموه بالأنحياز ل الأهلى أثناء وجودة فى مؤسسة الاهرام
- المهم عطالله ملحقش يقعد عالكرسى راح مرتضى طالع ع القضاء الإداري و واخد حكم بعودته رئيسا ل النادى و الحكم إتنفذ فعلا و رجع النادى مع أول رجوع ليه رفض برضو دخول إسماعيل سليم النادى ، طب يا بيه يهديك يرضيك قالهم لا مش هيدخل طب ندخل الأعضاء عشان نعمل إجتماع مجلس قالهم محدش داخل ، إسماعيل سليم خد بعضه و طلع ع الوزارة اللي بدورها حلت المجلس تانى والكلام ده كان في سنة 2006 و وقتها تم تعيين ممدوح عباس رئيسا ل النادى ، مرتضى يسكت لا طبعا خد بعضه و طلع ع القضاء و هاتك يا قضايا مرة يحجز ع النادي و مرة يحجز ع فلوسه و مرة يحجز ع الاصول وليلة كبيرة اوي سعادتك لدرجة لحد ما عباس نفسه زهق و إستقال في نهاية ٢٠٠٨ أشترى دماغه ،
- جيه محمد عامر رئيس نادى الراجل بالعافيه عمل إنتخابات و فاز بيها ممدوح عباس ، مرتضى يسكت لا طبعا رفع قضية تانى و المجلس إتحل تاني و وزارة الرياضه تدخلت ل إنقاذ النادى تانى وعينت الراحل المستشار جلال إبراهيم رئيس مؤقت و اللى عمل الحملة التاريخيه بتاعت ناديك يناديك و وقتها الملايين من جمهور الزمالك عملت ملحمة و تبرعوا ب 40 ألف جنيه وده كان صافي كل اللى جمعته ، فى 2011 رجع تانى ممدوح عباس رئيسا بعد ما رفع قضية هو كمان ، مرتضى يسسسكت لا طبعا راح المحكمة للمرة المش عارف كام و رفع و كسب و عباس إتبقلش تاني ، وزارة الرياضه كالعادة تدخلت و عينت الرئيس السابق ل النادي كمال درويش واللى معظم الزملكاويه شايفينه أنجح رئيس في تاريخ ناديهم المهم برضو فشل و كأن القدر هنا قرر يثبت ل الكل إن النجاحات اللي حققها سابقا كانت بسبب مرحلة تغيير الجلد التاريخيه فى الاهلى بعد وفاة صالح سليم وبعض القرارات الأخرى اللي خدها النادي زي قرار الأهلى مقاطعة البطولات الأفريقية و إن الموضوع مكانش شطارة منه
- ما علينا نرجع للحدوته فى 2014 حصلت إنتخابات جديدة كان مع مرتضى فى المجلس أحمد سليمان ، حصلت بعدها حكايات شبه اللي حصلت في 2005 ولولا إن الدوله اللي الزملكاويه بيتهموها بالتأمر كانت مكبرة دماغها كان زمان مجلس مرتضى بتاع 2014 إتحل ، زى إن مثلا مرتضى صحي في يوم الصبح قرر يستبعد أحمد سليمان اللي هو مختارة معاه في القايمه أصلا من المجلس و يحجمه و يزهقه في عيشته و يدخل معاه في صراعات مالهاش لازمة عشان شاف إن سليمان مستحوذ على قطاع الكرة و عايز يفضى السكه لأمير إبنه اللى عمره ما لبس شورت و فانله المهم سليمان زهق و إستقال و مرتضى مكدبش خبر و راح شاطبه
- بعدها سليمان قرر يدخل الإنتخابات ع منصب الرئيس مرتضى يسسسكت لا طبعا يأجر ناس تمنعه من دخول النادى و يصْربوا بعض كالعادة ، بعدها أتعمل قانون الرياضه و مرتضى نجح تاني فقرر برضو يمنع النائب بتاعه هانى العتال من دخول النادى لأنه تجرأ و نجح فى الإنتخابات على حساب إبنه احمد مرتضى ، العتال يسسسكت لا طبعا رفع قضية و خد حكم ومحدش نفذ و دخل الزمالك في حورات مش تحل مجالس لا دي تودي النيابه زي مثلا الاتجار في العم لة
- مرتضى يسسسسكت لا طبعا شطب احمد سليمان تانى و العتال و عبدالله جورج و ممدوح عباس للمرة المش عارف كام و كان فاضله شويه و يشطب الراجل اللى شايل النبله ، فضل عباس و الرجاله ينخربو ورا مرتضى لحد ما فجأة وزارة الرياضه صحيت من النوم و قررت توقف مجلس مرتضى عن العمل لاسباب ماليه زى ما أتقال وقتها و جات وقتها لجنة فى لجنة لاقيت النادى مديون بلميارات لأسباب مصر كلها عارفها و لقت إن جمهور الزمالك بيسْْْتمها هى و سايب اللى كانوا السبب فى الديون دى كلها لحد ما قرر الوزير فى ظروف غامضه يرجع مرتضى تانى و يعمل إنتخابات كالعادة الزملكاوية صْربوا بعض فيها تانى و كانت ملحمه الحقيقه لحد ما نجح أخيرا مرتضى مع قايمته ، مرتضى يسسسسكت لا طبعا راح عامل مؤتمر صحفى شتم العتال و سليمان و عباس و الشلة و حط معاهم واحد اسمه هانى شكرى ، هاااانى يسكت لا طبعا رفع قضية و إن شاء الله لما يكسبها نبقى نكمل الحكاية و توته توتة خلصت حدوتة المؤامرة الكونيه على الزمالك و على مرتضى منصور اللى بقاله 20 سنه فارش بسبح و مصليات تحت تمثال حلمى زامورا
#خوارزمياتمدينةالبط
تحرير هذه الصفحة
هل اعجبك محتوى الصفحة؟
تساعدنا ملاحظاتك على تحسين محتوانا.
- المقال السابق