مظلومية: اسباب عدم استقرار الزمالك

الوزير السابق الزمالكاوي خالد عبد العزيز هو الوحيد اللي حط ايده على الحقيقة لما قال اللي بيفشل في الزمالك او بيدير غلط أول ما تحصل المشاكل نتيجة ادارته بيبدأ يفهم الجمهور إن اللي بيحصل ده نتيجة مؤامرة او سبب غير مفهوم مع إن ده مش حقيقي وإن دي حجج وانه عنده اسرار من واقع منصبه السابق لو أعلنها الجمهور هيعرف قد ايه هو بيتمرر له كلام مغلوط كمبررات للفشل.

ازاي افعالك مش السبب

هو لما الزمالك كان نادي أمن مستقر بيحصد البطولات مع كمال درويش من التسعينات ل ٢٠٠٤ و مسيرة كانت الافضل في تاريخ الزمالك كبطولات وبتحقق في ٩ سنين ١٥ بطولة ٣ دوري و٢ كأس و ٢ سوبر محلي و٦ بطولات قارية ٢ دوري ابطال و٢ سوبر افريقي وواحدة كأس الكؤوس و واحدة افرو اسيوي ده غير بطولة عربية وسوبر مصري سعودي ووصلت لافضل ترتيب في تاريخك عالميا وعلى فكرة كان حسن حمدي موجود ووكالة الاهرام موجوده بس كان عكس ما انت بتقول كان في اسباب للنجاح وهي استقرار اداري واختيارات فنية جيدة كان ايه سبب التحول هل ظاهرة كونية هل ايادي خفية هل تغير مفاجئ غير معلوم الاسباب لا طبعا

الفشل حصل لما زالت اسباب الاستقرار انت بنفسك عملت فيديو عن ده زمان وعن دخول مرتضى الزمالك وانه نقطة التحول في ٢٠٠٥ يعني كنت عارف الاسباب مين اللي عمل المشاكل والصراعات والقضايا واعتداء رئيس النادي والنائب على بعض. طيب هل مرتضى كان اختيار دولة هل كان بالتعيين لا كان موجود في النادي من سنوات وفي ادارات مختلفة ولكن باختيار جمعية الزمالك العمومية نفسها تم منحه الرئاسة وقتها

الاغرب ان اغلب الاحداث اللي انت شايفها غير مفهومة واغلب الاخفاقات دي حصلت في عهد مسؤولين عن الرياضة المصرية كانوا زمالكاوية زي المهندس حسن صقر والمهندس خالد عبد العزيز والدكتور اشرف صبحي. بس برضوا انت شايف انك مش عارف اسباب الفشل مع ان اللي عمل المشاكل ورفع القضايا كان زمالكاوي واللي انتخبه اعضاء الجمعية العمومية الزمالكاوية وكل اللي بيحصل ان الدولة كانت بتنفذ احكام قضائية واخدها زمالكاوية على زمالكاوية تانيين بس برضوا لا دي مؤامرة على الزمالك. مع ان مرتضى نفسه اتوقف من سنة بقرار جهة ادارية ورقابية ورجع بحكم محكمة ومحدش قدر يمنع الحكم يتنفذ

طيب هل سبب الغرامات اللي وصل لملايين الدولارات على الزمالك غير معلوم هل اسباب وقف القيد مجهولة انت اللي كنت بتدير غلط وبتتعاقد غلط وبتمشي غلط وبترفع قضايا غلط وبتقيد لاعبين وانت عليك مديونيات للاتحاد بالمخالفة للوائح وكمساعدة بس مع ذلك لسه انت شايف ان اسباب الفشل غير مفهومة. هل رحيل فييرا وجروس كان وراهم شخص وسبب غير مفهوم ولا قرار اداري بارادة حرة بس برضوا انت شايف الاسباب غير مفهومة

في الحياة نوعين اشخاص بيواجهوا الحقيقة زي خالد عبد العزيز وبيحاولوا يحطموا تماثيل مؤامرات صمدت لسنين وده مش هيبقى له شعبية بينكم واشخاص هيبقى لهم شعبية وهما اللي بيقولوا للناس هي فين اسباب الفشل عشان يبين ان الفشل والاحداث كلها بدون علة او سبب والناس تردد الكلام اللي لقوا فيه طريق الهروب الوحيد من واقع عمرهم ما هيحاولوا يغيروه لأن الطريق البديل صعب ومتعودوش عليه وهي اعترافك بحقيقة مشاكلك وتناقضاتك واللي لو واجهوتوا نفسكم بيها كل اللي فات هينهار كل ثوابت الاوهام هتقع والمظلومية هتتحول لاكذوبة فالحل الوحيد هو مزيد من الهروب والبعد عن الحقيقة .

استمر 👌